REZOLUCIO DE LA 93-A UNIVERSALA KONGRESO DE ESPERANTO

La 93-a Universala Kongreso de Esperanto, kunveninte en Roterdamo de la 19-a ĝis la 26-a de julio 2008 kun 1845 partoprenantoj el 73 landoj por diskuti la kongresan temon “Lingvoj: trezoro de la homaro”,

Festante ĉi-jare la centjariĝon de Universala Esperanto-Asocio,

Notante la gravan rolon de lingvoj en la konservado de scioj kaj kulturoj, kaj en la ebligado de malsamaj aliroj al la mondo,

Rimarkante la daŭran diskriminacion kontraŭ lingvoj je ĉiuj niveloj kaj aparte kontraŭ la lingvoj de indiĝenaj popoloj kaj malplimultoj, kaj

Atentigante pri la valoro de la facile lernebla kaj neŭtrala lingvo Esperanto, kiu estas mem lingva trezoro de la homaro, kaj pri la pli ol centjara sperto de ĝia praktika utilo kiel ligilo inter kulturoj,

Varme bonvenigas la decidon de Unuiĝintaj Nacioj, ke la jaro 2008 estu Internacia Jaro de Lingvoj, kaj alte taksas la iniciatojn de Unesko en tiu kampo menciitajn en la mesaĝo de ties Ĝenerala Direktoro al la Kongreso,

Reemfazas la neceson doni egalan respekton al ĉiu lingvo, al ĉiu kulturo kaj al ĉiu homo en la mondo,

Alvokas la Esperanto-komunumon disvastigi Esperanton kaj ĝiajn valorojn de respekto al ĉiu homo kaj de egaleco inter ĉiuj homgrupoj, kaj per tio kontraŭbatali la malaperon de lingvoj kaj kulturoj tra la mondo,

Invitas al kunlaboro kun ĉiuj organizaĵoj kaj instancoj kiuj laboras por konservi lingvojn kaj kulturojn kaj defendi lingvajn homajn rajtojn,

Instigas ĉiujn agnoski la esencan valoron de lingva diverseco, lige kun la kreskanta agnosko pri biologia diverseco, kaj

Proponas al la monda komunumo science esplori la rolon de Esperanto en pli efika kaj justa komunikado tra la mondo.

REZULTOJ DE LA ORATORA KONKURSO

En la Oratora Konkurso de la 93-a UK en Roterdamo partoprenis kvin gejunuloj el kvin landoj. La unuan premion gajnis Daniel Moreno Martinez el Meksiko pro parolado pri la temo “Ĉu oni devas kontraŭbatali la malaperon de lingvoj?” La duan premion ricevis David Welsh el Norvegio, kiu traktis la temon “Ĉu povas harmonie kunvivi malsamaj kulturoj?, kaj la trian Francesco Maurelli el Italio, kiu parolis pri la sama temo kiel la laŭreato de la unua premio.

Publicado en fake, movado, novaĵoj, uea, uk. Etiquetas: , , , . Leave a Comment »

INFANLIBRO DE LA JARO

Kadre de la Belartaj Konkursoj de UEA okazis ankaŭ konkurso pri la titolo “Infanlibro de la Jaro 2007”, en kiu eldonejoj rajtis konkursi per libroj eldonitaj pasintjare. Partoprenis du libroj, el kiuj la ĵurio premiis “Breno kaj Bruno”. Temas pri kolora 32-paĝa verko pri amikeco inter labradora hundo kaj ties mastro. Ĝi estas originale verkita en Esperanto de Paulo Sergio Viana, kiu jam kelkfoje antaŭe estis premiita en la Belartaj Konkursoj, interalie per la unua premio en la proza branĉo en 2002.

EKS-PREZIDANTO DE UEA D-RO LEE CHONG-YEONG FORPASIS

Lee Ĉon Yong

La antaŭa prezidanto de UEA, Lee Chong-Yeong, forpasis en Koreio la 4-an de julio 2008 en la aĝo de 76 jaroj. Li naskiĝis la 13-an de februaro 1932 en Samcheonpo, Koreio. Li studis ĉe la universitatoj Yeungnam (Koreio), Havajo kaj Harvard (Usono) kaj doktoriĝis en Japanio pri komerca ekonomiko. Li laboris kiel ĉefo de la merkatuma grupo de la organizaĵo de Unuiĝintaj Nacioj pri Nutraĵoj kaj Agrikulturo kaj estis emerita profesoro de la Ŝtata Universitato Kyungpook (Koreio). Kiel prezidanto de UEA Lee Chong-Yeong iniciatis la Nitobe-simpozion, kiu okazis unuafoje en la Universala Kongreso de Esperanto en Prago en 1996, kaj estis inter la iniciantintoj de la Manifesto de Prago.

Lee Chong-Yeong lernis Esperanton en la jaro 1949, kiam li estis 17-jara, kaj estis prezidanto de Korea Esperanto-Asocio (1994-95, 1998-2001) , prezidanto (1995-1998) kaj vicprezidanto de UEA (2001-2004).

Li verkis kelkajn librojn pri Esperanto en la korea, kaj ankaŭ la dokumenton “Esperanto en Internaciaj Organizaĵoj”, eldonitan de UEA en 2003. Li ankaŭ estis unu el la ĉefaj agantoj por la eldono de la ĉina-japana-korea komuna verko Historio por Malfermi Estontecon. Li estis honora membro de UEA.

REVUO ESPERANTO – JULIA NUMERO ELŜUTEBLA

En la retejo UEA.ORG jam estas elŝutebla la PDF-versio de la julia-aŭgusta numero de la revuo Esperanto.
Por elŝuti la numeron bonvolu viziti retpaĝon http://reto.uea.org (unuafojaj venintoj bezonas registriĝi).
La enhavlisto de la numero:

Malferme: Lando kaj gazetaro en komuna renoviĝo (Humphrey Tonkin). Niaj ĵurnalistoj kongresis en Vilno (stma). Interlingvistika Simpozio okaze de la 10-jariĝo de la Interlingvistikaj Studoj UAM (Ilona Koutny). Esperanta murpentraĵo solene prezentita (Przemysław Wierzbowski). Kalendaro 2008-2009. La renesanco de Esperanto-bibliotekoj (Michela Lipari). Recenzoj: Hokan Lundberg pri Dio, psiĉjo kaj mi. Mikaelo Bronŝtejn pri Internacia lingvo. Heidi Goes pri A summary of the World / Un resumen del mundo / Un Résumé du monde / Die Welt in der Zusammenfassung / Resumo de la mondo. Nikola Rašić pri Ksenofobia gvidlibro al la nederlandanoj.  Thorsen-apogo je dispono de bibliotekoj. Laste aperis. Oficiala informilo. Veturi per la trajno Zamenhof (Przemysław Wierzbowski).  Rezolucio de pola Sejmo pri UEA. Esploroj pri UK en Moskvo (Osmo Buller). Francaj esperantistoj en Martigues. Forpasoj. IKU-resumoj en la reto (Amri Wandel). 93-a UK: Francio la plej amasa (Osmo Buller).

La julia-aŭgusta PDF-versio de la revuo Esperanto estas trovebla sub la menuero TEKO – kune kun pluraj antaŭaj numeroj. Junaj membroj trovos tie ankau PDF-versiojn de revuoj TEJO-tutmonde kaj Kontakto.

Publicado en uea. Etiquetas: , , . Leave a Comment »
A %d blogueros les gusta esto: